On beşinci fəsil: Nizam-intizam
Böyük Rəhbər hərbi işləri bir hərbçiyə xas formada yerinə yetirir. O, öz proqramlarında, görüşlərində və çıxışlarında hərbi məqamlara ciddi riayət edir.
1988-ci ildə o, Əhvaza gəldi. Bölgənin yüksək rütbəli zabitləri onun yanında müharibə məsələləri haqqında iclas keçirdilər. Yüksək komandanlardan biri və cənubun əməliyyat bölməsinin zabiti bu iclasa poqonsuz gəlmişdi. Quran oxunduqdan sonra Ayətullah Xameneinin gözü o zabitə sataşdıqda buyurdu: "Cənab, siz nə üçün poqon taxmamısınız?” Mən onda Müdafiə Nazirliyinin Quru Qoşunlarının komandan muavini idim, amma bu məsələ diqqətimi çəkməmişdi. O zabit cavabında dedi: "Mən general olmalı idim, amma ikinci dərəcəli general olmuşam. Bu rütbə mənim üçün çox azdır”. Ağa çox hirsləndi və buyurdu: "Siz qanunu pozmusunuz, bu intizamsızlıqdır. "Bu rütbə azdır” nə deməkdir, gedin poqonlarınızı taxın”.
Ağanın nizam-intizam yaratmaq üçün belə qətiyyəti çox tərifəlayiqdir. Ən çox mənəvi və ruhani hesab olunan bir komandan hərbi nizam- intizama bu qədər əhəmiyyət verir. Biz hərbçi ola-ola bu məsələyə diqqət yetrməmişdik, amma Ağa bu məsələni əhəmiyyətli bilib o zabitə qarşı təpki göstərdi.
Həmin şəxs iki ildən sonra lütf və mərhəmət sayəsində general oldu.
General Əliəsğər Camali
Qanunu pozanları cəzalandırmaq
Böyük Rəhbər çox mehribandır, amma ümumi məsləhətlər məsələsi ortaya çıxdıqda, heç bir səhvi bağışlamır. Bədr, ya da Xeybər əməliyyatı zamanı bir-iki komandir səhlənkarlıq etmişdi. O, bu məsələdən xəbərdar oldu, Ali Şura Məclisinin sədri kimi İmama məktub yazıb, qanunu pozanları ağır cəzalarla cəzalandırmasını istədi. Ayətullah Xameneinin o dövrdə belə rəftarı çox təsirli idi və müharibənin vəziyyətində nizam-intizam yaradılmasında çox təsir qoydu.
General Hidayət Lütfiyan
Böyük Rəhbərin nizam-intizamı hamının dillər əzbəridir. O, çox nizamlı şəxsdir, silahlı qüvvələr arasındakı çıxışlarında da hamını nizam-intizama dəvət edir. Bəzən intizamsızlıq gördükdə əsəbiləşib buyurur: "Hərbi qüvvələrdə intizamsızlıq olmamalıdır, get-gəl, iş başında hazır olmaq və silahlı qüvvələrin zahiri görkəmi intizamlı olmalıdır”. O, dəfələrlə hərbçilərlə keçirdiyi iclaslarda nizam-intizam üzərində çoxlu təkid göstərmişdir. O, hərbçilərin paradına nəzarət edir, bəzən ən kiçik və ən cüzi hərəkətləri onların komandirinə deyir. Ali Baş Komandan tərəfindən məsələlərə belə yanaşma biz hərbçi zabitlərin hamısı üçün örnəkdir.
General Abdullah İraqi
Həzrət İmam Rzanın (ə) pak ziyarətgahını təmizləyirdilər. Ziyarətgahın işçiləri, ziyarətgahın tozunu alanlara gülaba vurulmuş ağ dəsmal verirdilər. Böyük Rəhbər bir qədər işlədikdən sonra dəsmalı öz üzünə və əlinə çəkirdi. O, bu tədbirlərin birində İmam Rzanın (ə) ziyarət kompleksinin sədri cənab Vaiz Təbəsiyə buyurdu: "Mən bu təbərrüklü dəsmalı özüm üçün götürə bilərəm?”
İmam Rzanın (ə) ziyarət kompleksinin sədrliyini cənab Təbəsiyə Əzəmətli Rəhbər vermişdi, amma bununla yanaşı, İmam Rzanın (ə) zərihinin tozu ilə təbərrük edilmiş parçanı götürmək üçün ondan icazə alırdı.
Böyük Rəhbərin qanuna hörməti bizim hamımız üçün dərsdir. O, cənab Vaiz Təbəsidən icazə aldıqdan sonra gözləri yaşlı halda və raz-niyazla məşğul ikən dəsmalı qatladı və cibinə qoydu. Bizim üçün olduqca maraqlı idi ki, Ağa belə bir halda təbərrüklü dəsmalı səliqə ilə qatlayıb cibinə qoymağa diqqət yetirir.
Höccətül-İslam Həqqani
