Füzuli

Şirin

Allahın evi–Kəbeyi-müəzzəməni ziyarət etmək arzusunda olan müsəlmanlar səfər əsnasında həmişəkindən daha çox duaya ehtiyac duyurlar.

Biz də səy edirik ki, Hərəmeyndə lazım olan duaları zikr edək.

Dua iki qismdir:

1. Bəziləri öz arzu və istəklərinə çatmaq üçün öz dili ilə, bacardığı qədər və qabiliyyətinə görə Allahın dərgahına dua edir. Bu cür dualara "varid olmayan” (Əhli-beyt əleyhimussalam tərəfindən söylənilməyən) dualar deyilir.

2. Bir çoxları isə xüsusi ləfzlə 14 məsum (əleyhimussalam)-dan gəlib çatan dualarla Allahdan mətləb diləyirlər ki, bunlara da "məsurə” dualar deyilir.

Əlbəttə, "məsurə” duaların savab və fəzilətləri həddən ziyadədir.

İmam Cəfəri Sadiq (əleyhissalam)-dan sual etdilər ki, niyə bizim dualar qəbul olunmur? İmam cavabında buyurur: "Bir kəsə dua edirsiniz ki, onu tanımırsınız.”

Həzrət Əli (əleyhissalam)-dan bu barədə sual etdilər: Bir halda ki, Allah-Taala "Məni çağırın, Mən də sizin köməyinizə çatım.” buyurub, bəs səbəb nədir ki, biz Allahı çağırırıq, O isə bizə tərəf baxmır.

İmam buyurdu: "Siz Allahı tanıdınız, lakin Onun haqqını əda etmədiniz.”

Həzrət Peyğəmbər (səlləllahu əleyhi və alihi və səlləm) isə buyurub: "Hər kim duasının Allah yanında qəbul olunmasını istəyirsə, gərək qazancı və yediyi çörəyi halal olsun.”

İmam Baqir (əleyhissalam) buyurub: "Allah-Taala boynunda xalqın haqqı olan bəndələrin dualarını qəbul etmir.”

İmam Sadiq (əleyhissalam) buyurub: "Hər kim qırx möminə dua etsə, duası müstəcab olar.”

Allah-Taala Həzrət İsaya buyurdu: "Ey İsa, Mənə elə dua et ki, sanki qəm dəryasına qərq olmusan və fəryadına sənin Rəbbindən başqa heç kim yetişmir.”

Duanın şərtlərindən biri də özünü ruhən və qəlbən pak etmək və Allah dərgahına yaxın olmaqdır.

Duanın lüğətdəki mənası çağırmaq deməkdir. Amma müsəlmanların istilahında Allahla razü-niyaz etməkdir. Dua Quran kimi Allahla danışmaqdır, fəqət fərqi ondadır ki, Quran göydən yerə nazil olub, dua isə yerdən göyə ucalır.

İran İslam İnqilabının dahi rəhbəri mərhum İmam Xomeyni əxlaq dərslərinin birində buyurur ki, Quran Allah tərəfindən, işıqlı səmadan bəndələrə nazil olub, dua isə bəndələrin tərəfindən Allahın dərgahına yüksəlir.

Göydən yerə enən və yerdən göyə qalxan kəlam-hər ikisi nəticə etibarı ilə insanın düzgün tərbiyələnməsindən ötrüdür. Hər ikisi də Allahla bəndə arasında əlaqə yaratmaqdır. Quran Allah kəlamıdır, insanlara xitabdır. Dua isə insanların Allaha olan yalvarışıdır. Odur ki, Quran və hədislərə istinad edərək deyə bilərik ki, dua ən gözəl ibadətlərdən biridir, hətta dua ibadətlərin məğzidir.

Dua Allahdan istəməkdir və Allah Öz bəndələrinin sızıltısını sevər. Hədislərdə rəvayət olunur ki, Allah Öz bəndəsinin ahü-naləsini eşidəndə mələklərə deyər ki, onun istəyini verməyə tələsməyin. Qoy bəndəm çox ahü-zar etsin, Mən onun yalvarışlarını sevirəm.

Necə ki, Allah-Taala Öz kitabında buyurur: "Məni çağırın, Mən də sizə cavab verim, duanızı qəbul edim.”

Bundan məqsəd odur ki, Allah Öz bəndəsinin "Ya Rəbb!” fəryadını eşitsin.

Əlbəttə, Allah-Taala bəndənin istəməsi olmadan da, yəni qeydsiz-şərtsiz onun istəyini verməyə qadirdir.

Həm də Allah-Taala bilmək istəyir ki, hansı bəndəsi Onu yada salır və hansı bəndəsi Onu unudub. Allahla razü-niyaz edən bəndələr bu əlaqədə xüsusi bir şirinlik duyurlar.

Dördüncü İmamımız Həzrət Zeynəl-abidin (əleyhissalam) dualarının birində deyir: "Ey Allah! Sən münacatın (əlaqənin) şirinliyini və Səninlə ünsiyyətdə olmağın ləzzətini dostlarına dadızdırırsan.”

Buradan belə nəticə hasil olur ki, Allahın dostlarının ləzzəti təkcə maddi yox, həm də ruhi və mənəvi həzzdir. Bəzi hədislərdə deyilib ki, Allah-Taala qəzəb etdiyi kimsəni duanın şirinliyindən məhrum edər.

"Kumeyl” duası yüksək məzmunlu dualardan biridir. Həzrət Əli (əleyhissalam) bu duanı oxumaqla Allahla əlaqəsini möhkəmləndirər və hər dəfə bu duanı oxuduqca göz yaşı tökərdi.

Arzu edirik ki, Allah-Taala bütün müsəlmanlara duanın şirinliyini nəsib eləsin. Onların ibadət və dualarını qəbul eləsin, inşallah!

Həzrəti Məhəmməd (səlləllahu əleyhi və alihi və səlləm) buyurub: "Dua möminin silahı və dinin sütunudur.”

Həmçinin Əhli-Beyt (əleyhimussalam)-dan varid olub ki, böyük Allahın dərgahında ibadətlərin ən yaxşısı və yer üzərində əməllərin ən sevimlisi duadır.

Həzrət Əli (əleyhissalam)-ın haqqında nəql edirlər ki, o Həzrət dua çox oxuyarmış. Belə ki, əshabından biri rəvayət edir ki:

Bir gecə ay işığında, ətrafda olan xurma ağaclarının araxasında kiminsə əyilib-düzəlməyini görərək özümü ona yetirdim və gördüm ki, o şəxs başı səcdədə hönkürtü ilə ağlayır. Bir müddətdən sonra onun səsi kəsildi. Mən onun kim olduğunu bilmək üçün üzü üstə düşmüş bədənini çevirmək istədim. Mən onu mübarək gözlərindən tanıdım. O Həzrət Əli (əleyhissalam) idi. Bir qədər onun başı üstə oturdum, özünə gəlmədiyini görərək, yəqin etdim ki, dünyadan gedib. Mən Həzrət Əli (əleyhissalam)-ın evinə yollandım və onun dünyadan getdiyini Həzrət Fatimə (əleyha salam)-a çatdırdım. Həzrət buyurdu ki, əmim oğlu dünyadan getməyib, O, Allahın qorxusundan o vəziyyətə düşüb.

Allah-Taala buyurur: "Siz, ey müsəlmanlar, heç vaxt duanı tərk etməyin, çünki Haqq tərəfinə yaxınlaşmaq üçün ondan yaxşı vasitə yoxdur.”

İmam Cəfər Sadiq (əleyhissalam) buyurur: "Babam Həzrət Əli (əleyhissalam) buyurardı: "Dua oxumaq mömin insan üçün bəlalar qarşısında bir qalxandır. Əgər bir evin qapısını çox döysən axırda üzünə açılar.”

Allah-Taala ürəyin istəklərindən agahdır, lakin insanların ehtiyaclarının Onun dərgahında dua ilə istənilməsini sevir.

Quranda adı çəkilən bəzi peyğəmbərlər və övliyaların təvazökarlıqla etdikləri dualar:

1. Ey bizim Pərvərdigarımız, Sənin hansısa bir əmrini yerinə yetirməyi yaddan çıxarmışıqsa, yaxud bir işdə bizdən xəta baş veribsə, onu bizim üçün günah yazma. Ey Rəbbimiz, bizimlə elə rəftar et ki, keçmişlərimizlə rəftar etmisən, ağır vəzifələri bizim çiynimizə qoyma.

Ey bizim Pərvərdigarımız, yerinə yetirməkdə qüdrət və qüvvəmiz olmayan işi bizə həvalə etmə. Öz lütfünü bizdən əsirgəmə və bizi bağışla, çünki Sən bizim mövlamızsan.

2. Pərvərdigara, mənim ürəyimi geniş, işlərimi asan et. Mənim dilimə lətafət və düzgünlik ver ki, danışığımı dərk etsinlər.

3. Pərvərdigara, hesab çəkəcəyin gündə məni, valideynlərimi və möminləri bağışla!

4. Pərvərdigara, bizi düz yola hidayət etdikdən sonra qəlblərimizi batilə tərəf döndərmə, Öz tərəfindən bizə rəhəmət əta et, çünki Sən bağışlamağı sevirsən.

1. Duanın qəbul olunması şərtlərindən birincisi odur ki, əvvəlcə Allaha həmdü-səna edəsən, sonra Peyğəmbər və onun Əhli-Beytinə salavat deyəsən.

2. Bütün günahlarını nəzərə alıb Allahdan bağışlanmağını istəyəsən.

3. Ümidini bütün bəndələrdən kəsib, yalnız tək və qadir olan Allaha ümid bağlayasan.

4. Təkcə dil və ürək yox, gərək insanın bütün əzaları dua halında olsun.

5. Duanın müstəcab olmağına qətiyyən şübhə edilməsin.

6. Gərək Allahın hökmlərini yerinə yetirməyə əzm edə.

7. Allahı, Onun dərgahına yaxın olan müqəddəs şəxslərə (Peyğəmbər və İmamlara) and verə.

8. Duanın müstəcab olmağında müqəddəs zamanların (Qədr gecəsi, azan vaxtı, iftar vaxtı, cümə gecəsi, Ərəfə günü) mühüm rolu var.

9. Ümumilikdə (bir neçə nəfərlə birgə) edilən duanın təsiri daha güclüdür.

10. Əlləri yuxarı qaldırıb bərkdən dua etmək lazımdır.

11. Dua halında ağlamaq gərəkdir.

12. Dua edən şəxsin yeməyi və geyimi halal olmalıdır.

1. Dua edən bəndə Allahla əlaqədə olduğuna görə, Quranın buyurduğu kimi, qəlbə bir sakitlik, aramlıq gətirir və insanı həyəcandan qurtarır.

2. Dua edib Allahı yad etmək, ürəkdə bir nur yaratmaqla insana yeni bir həyat verər.

3. Dua edən şəxs Allahın məhəbbətini qazanar.

4. Dua edən şəxs şeytandan və şəhvətdən uzaq olar.

5. Dua peyğəmbərlərin silahıdır; dua insanların düşmənlərini məğlub edər, özünə isə ruzi yetirər.

6. Dua insanı ruhi xəstəliklərdən xilas edər.