İYİRMİ ALTINCI DƏRS
1.
Vəhhabilər necə inkişaf etdilər?
2.
İslam aləmində vəhhabilərin rolu və tə’siri necə olmuşdur?
Keçən
dərslərdə vəhhabilərin öz nəzərləri, eləcə də onların sair müsəlmanların əməl və
əqidələri ilə əlaqədar olan fikirləri araşdırılıb tənqid edildi. Vəhhabilər
müsəlmanların bir çox əməl və rəftarlarını şirk hesab etdiklərinə görə yarandığı
ilk vaxtlardan e’tibarən (yə’ni, Məhəmməd ibni Əbdül Vəhhabın dövründə) İslami
bina və əsərləri məhv edib aradan aparmaq fikrinə düşdülər; bu məqsədlə də
müxtəlif şəhərlərə hücum etdilər, müsəlmanlardan çoxunu müşriklikdə
təqsirləndirib qılıncdan keçirdilər. Bu dərsdə vəhhabilərin törətdikləri
cinayətlər qısa şəkildə şərh olunacaq.
On
doqquzuncu dərsdə qeyd olundu ki, Məhəmməd ibni Əbdül Vəhhab Nəcd vilayətinin
Dir’iyyə şəhərinə daxil olduqda, kiçik Ğuneyzə qəbiləsinin əmiri olan Məhəmməd
ibni Səuda bütün Nəcd əyalətinə rəhbər olmaq və’dəsi verərək, onu özü ilə
həmfikir edə bildi və daha sonra (h.q.1159-də) qonşu qəsəbə və şəhərlərə hücum
etdi; uzun-uzadı çarpışmalardan, camaatın kütləvi şəkildə qətlə yetirilməsindən
sonra o, Nəcd vilayətinə tam mə’nada hakim kəsildi.
Məhəmməd
ibni Səud 1179-cu hicri ilində Nəcd əyalətində 30 il hökmranlıq etdikdən sonra
öldü və onun oğlu Əbdül Əziz atasının yerinə keçdi. Məhəmmədin ən böyük oğlu
olan Əbdül Əziz təqribən 30 il müxtəlif qəbilələrlə vuruşdu və 1208-ci hicri
ilində Ehsa və Qüteyd məntəqələrini ələ keçirib Fars körfəzi sahillərinə çatdı.
Həmin vaxtlarda yə’ni, 1206 ya 1207-ci hicri ilində Məhəmməd ibni Əbdül Vəhhab
dünyadan getdi və böyük oğlu şeyx Əbdüllah onun yerinə keçdi.
1207-1214-cü
hicri illərində vəhhabi ordusu Məkkəni ələ keçirmək uğrunda Məkkə əmiri Şərif
Ğaliblə müharibəyə başladı və nəticədə bu müharibə qarşılıqlı sülhlə sona
çatdı.
Əbdül
Əziz 1215-ci ildə oğlu Səud və Nəcd əyalətinin köçəri və yerli əhalisi ilə
birlikdə Həccə doğru hərəkət etdi, amma yolda özündə ağırlıq hiss edərək Nəcdə
qayıtdı və həcc səfərini Səud yerinə yetirdi. O, bu səfərində Əsir, Təhamə, Bəni
hərb qəbilələrini özünə müttəfiq edə bildi.
Vəhhabilər
1214-cü ildə Nəcəfi-Əşrəfə hücum etdilər, lakin Xəzail ərəblərinin şiddətli
müqaviməti ilə qarşılaşdılar və 300 nəfər təlafatla geri çəkilməyə məcbur
oldular. 1216-cı ildə də Səud ibni Əbdül Əziz atasının göstərişi ilə Kərbəlaya
həmlə etdi və camaatı kütləvi şəkildə qırdı. Vəhhabi yazıçılarından olan
Səlahəddin Muxtar yazır: «1216-cı ildə əmir Səud böyük qoşunla Nəcd camaatından
və Vəhbub, Hicaz və Təhamənin köçərilərindən bir çoxu ilə İraqa doğru hərəkət
etdi; Zilqə’də ayında Kərbəlaya çatdı və oranı mühasirəyə aldı. Həmin qoşun
şəhərin qala divarlarını dağıdaraq, zorla içəri daxil oldular. Camaatın çoxunu
küçədə, bazarda və öz evlərində qətlə yetirdilər və günortaya yaxın şəhərin
çoxlu miqdarda qənimət və var-dövlətini ələ keçirərək xaric oldular. Sonra Əbyəz
adlı bir yerdə toplaşaraq qənimətləri öz aralarında böldülər.» Vəhhabi
tarixçilərindən olan Şeyx Osman ibni Bişr yazır: «Qəbrin (Hüseyn ibni Əlinin
məqbərəsinin) günbəzini viran etdilər. Zümrüd, yaqut və sair cəvahiratla
bəzədilmiş qəbrin üzərindəki sandığı oğurladılar və şəhərdə mövcud olan
mal-dövlət, silah, libas, xalça-palaz, qızıl-gümüş, nəfis Qur’anlar və sair
şeyləri qarət edərək günorta zamanı şəhərdən çıxdılar. Bu zaman Kərbəla
əhalisindən 2000 nəfərə yaxın öldürmüşdülər».
Vəhhabilər
1221-ci ildə Nəcəfi-Əşrəfə həmlə etdilər, amma şəhərin bürcləri, keşikçi
postları olduğuna və ətrafa xəndək çəkildiyinə görə, digər tərəfdən camaat və
dini tələbələri şeyx Cə’fər Kaşiful-ğitanın rəhbərliyi ilə şəhəri müdafiə
etdiyinə görə vəhhabilər şəhərə daxil ola bilmədilər, 700 nəfər təlafatla geri
çəkilməyə məcbur oldular. Oradan Hilləyə həmlə etdilər. Yenə də camaatın tam
hazırlığı və kəskin müqaviməti ilə rastlaşdılar. Bir daha Kərbəlaya hücum
etdilər. Bu dəfə Kərbəla camaatı müqavimətə hazırlıqlı idilər. Buna görə də
müharibə şəhərdən kənarda baş verdi və Səud öz qoşunu ilə şəhərə daxil olmadan
geri qayıtdı. Vəhhabilər bir daha 1225-ci ildə Nəcəf və Kərbəlaya hücum etdilər,
bir müddət bu iki şəhəri mühasirədə saxladılar və oraya gələn ziyarətçilərin
çoxunun mal-dövlətini qarət edib özlərini də qətlə yetirdilər.
Vəhhabi
ordusu 1217-ci ildə Əbdül Əzizin göstərişi və Osman Məzayiqinin komandanlığı ilə
Taif şəhərinə (Məkkənin 12 fərsəxliyində yerləşir) həmlə etdilər və camaatı
kütləvi şəkildə qırdılar. Cəmil Sidqi Zəhavi Taifin fəth olunması barədə belə
yazır: «Vəhhabilərin ən çirkin işlərindən biri camaatı kütləvi şəkildə qırmaları
idi. Onlar böyüyə kiçiyə rəhm etmədilər, südəmər uşaqların başlarını analarının
qucağındaca kəsdilər. Qur’an öyrənməyə məşğul bir qrupu öldürdülər, evlərdə bir
kəs qalmadığından mağazalara, məscidlərə gedib qarşılarına çıxan hər bir şəxsi,
hətta səcdə halında olan namaz qılanları belə öldürdülər. Aralarında çoxlu
Qur’an, «Səhihi Buxari», «Səhihi Müslüm» və s. fiqh və hədis olan külli miqdarda
kitabları küçə-bazara dağıdıb məhv etdilər. Bu hadisə 1217-ci hicri ilində baş
vermişdi.»
Bundan
sonra vəhhabilər Məkkəyə üz tutdular. Bu dəfə vəhhabi ordusu Səudun rəhbərliyi
ilə 1218-ci ilin Məhərrəm ayında Məkkəyə daxil olub oranı işğal etdi. Məkkə
əhalisi vəhhabilərin törətdikləri ağır cinayətləri, vəhşicəsinə əməlləri və
faciələri eşitdiklərindən həmin faciələrin təkrar olunmaması naminə onun
hakimiyyətini qəbul etdilər. Bu zaman Səud onlardan tələb etdi ki, qəbirlərin
üzərində düzəldilən qübbələri öz əlləri ilə dağıtsınlar. Buna görə də vəhhabilər
camaatın bir çoxu ilə bel və külüng götürüb «Cənnətül-Müəlla» qəbristanlığına
getdilər və orada çoxlu günbəzləri o cümlədən Əbu Talibin, Əbdülmüttəlibin,
Xədicənin, Peyğəmbərin (s) övladlarının günbəzlərini, həmçinin Peyğəmbərin (s),
Əbu Bəkrin, Əli (ə) və Xədicənin doğulduğu yerdəki günbəzləri dağıtdılar.
Məkkənin
işğal olunmasından iyirmi gün sonra Səud Cəddəni işğal etmək və Şərif Ğalibi
tutmaq üçün (o dövrdə Cəddədə əmir idi) Cəddəyə doğru hərəkət etdi. Səkkiz gün
bu şəhəri mühasirədə saxladı, şəhəri müdafiə edən topxananın təzyiqləri altında
Cəddəni işğal etmək fikrindən döndü və iranlıların Fətəli şah Qacarın göstərişi
ilə Nəcdə hücum etməsi xəbərini eşitdikdə Nəcdə qayıtdı. Səudun Nəcdə qayıtması
ilə eyni zamanda Şərif Ğalib ona hədiyyə olunan topxana ilə Məkkəni azad etmək
üçün hərəkət etdi və vəhhabilərlə ağır çarpışmadan sonra Məkkəni öz ixtiyarına
keçirdi. Amma 1219-cu ildə Məkkə yenidən Səudun vasitəsi ilə mühasirəyə alındı
və Məkkə əhalisinin həyat şəraiti o qədər ağırlaşdı ki, hətta az qaldı aclıq və
xəstəlikdən kütləvi şəkildə məhv olub aradan getsinlər. Nəhayət Şərif Ğalib
1220-ci ildə vəhhabilərin əqidəsini qəbul edərək Səuda təslim oldu.
Səud
1220-ci ildə Mədinəyə həmlə etdi, oranı bir il yarım mühasirədə saxladıqdan
sonra işğal etdi. Osmanlı dövləti tərəfindən şəhərə tə’yin olunmuş qazini
şəhərdən qovdu və Peyğəmbərin (s) pak qəbrini, eləcə də «Bəqi»də dəfn olunmuş
böyük şəxsiyyətlərin qəbrlərini ziyarət etməyi qadağan etdi. Sonra vəhhabilərə
göstəriş verdi ki, «Bəqi» qəbristanlığının qəbir və hasarlarını dağıtsınlar.
Buna görə də onlarla birlikdə qəbristanlığa həmlə etdi, orada mövcud olan
abidələri və qəbirləri dağıdıb, yerlə-yeksan etdi, gördükləri hər bir qiymətli
əşyaları qarət etdi.
SURİYAYA VƏ MƏSQƏTƏ
HƏMLƏ
Vəhhabilər
1225-ci ildə Əbdüllah ibni Səudun sərkərdəliyi ilə Suriyada yerləşən Xoran
məntəqəsinə həmlə etdi və camaatın var-yoxunu taladı, əkin sahələrini yandırdı,
qadınları əsir etdi, uşaqları qılıncdan keçirib evləri dağıtdı və böyük bir
qrupu didərgin saldı.
Sonrakı
il (1226-cı) Məsqəti işğal etmək məqsədi ilə oraya həmlə etdi. Lakin, bu şəhərin
əmiri İrandan kömək istədi və oradan kömək üçün Məsqətə tərəf bir ordu yola
düşdü və vəhhabilərlə qarşılaşdı. Vəhhabilər çoxlu insan təlafatı verdilər,
onların sərkərdələri Seyf ibni Malik və Məhəmməd Seyf də yaralı halda
qaçdılar.
TƏNƏZZÜL VƏ YENİDƏN
DİRÇƏLİŞ
1225-ci
ildə Məhəmməd Əli Paşa (Misirin sultanı) Osmanlı sultanının göstərişi və oğlu
Əhməd Tulunun sərkərdəliyi ilə Yənbu limanına doğru bir qoşun göndərdi. O,
vəhhabi Əbdüllah ibni Səudun başçılığı altında onun qoşunu ilə apardığı bir neçə
döyüşdən sonra 1227-ci ildə onunla sülh bağladı, nəticədə Məkkə, Mədinə və Taif
şəhərlərini azad etdi. Taifin fatehi Osman Muzayifi və Mədyənin əmiri Mübarək
ibni Mizyanı tutub Misirə apardı və orada qətlə yetirdi. Həmin halda Məhəmməd
Əli Paşa bir ordu ilə dəniz yolundan Hicaza hərəkət edib Cəddə limanına yan
aldı, sonra Cəddədən Məkkəyə getdi və oranı öz qərargahı seçdi. Daha sonra Nəcd
əyalətindəki Qunfuzə məntəqəsini işğal etmək üçün həmlə etdi və şiddətli
döyüşdən sonra oranı ələ keçirdi. Məhəmməd Əli Paşa təqribən 1230-cu ildə
İbrahim paşanın sərkərdəliyi ilə başqa bir qoşunu Nəcdə göndərdi. İbrahim
1332-ci ildə Nəcddə Riclə əyalətini öz əlinə keçirdi və daha sonra vəhhabi
hökumətinin mərkəzi olan Dir’iyyəyə hücum etdi, ağır döyüşdən sonra 1234-cü ildə
şəhəri aldı. Həmin ilin Şə’ban ayında İbrahim Paşa Məhəmməd Əli Paşanın
göstərişi ilə böyük və təmtəraqlı şəhər olan Dir’iyyəni, əhalisini boşaltdıqdan
sonra tamamilə dağıdıb yerlə yeksan etdi və sonra Misirə qayıtdı.
1234-cü
ilin axırlarında şəhərdən qaçan vəhhabilərin çoxu xaraba qalmış Dir’iyyəyə
qayıtdılar və oranı tə’mir etməyə başladılar. Vəhhabi başçılarından Məhəmməd
ibni Muşari (Səud ibni Əbdül Əzizin bacısı oğlu) və Türki ibni Əbdüllah şəhərdən
qaçıb gizlənmişdilər və bu zaman onlar da şəhərə qayıtdılar. Qüvvələrini nizama
saldıqdan sonra çoxlu həmləyə tədarük görüb əvvəlcədən işğal etdiyi məntəqələrin
hamısına yürüş etdilər. O yerləri yenidən işğal etdikdən sonra ilk hücumda
törətdikləri əməlləri, o cümlədən İslami tikililərin məhv edilməsi, böyük
şəxsiyyətlərin qəbirlərinin dağıdılması və s. kimi işləri təkrar etdilər və
1344-cü ilə qədər təqribən Hicazın hər bir yerinə hakim oldular.
1.
Vəhhabilər Nəcd əyalətinə necə hakim oldular?
2.
Vəhhabilər İraqa həmlə etdikdə hansı işləri gördülər?
3.
Vəhhabilər Məkkə və Mədinəyə nə vaxt həmlə etdilər və oranı necə tutdular?
4.
Vəhhabilər Mədinəyə həmlə etdikləri zaman nə kimi işlər gördülər?
İYİRMİ
YEDDİNCİ DƏRS
1.
Təhaviyyə, Cühəmiyyə və Kiramiyyə məzhəblərinin təfəkkürü necədir?
2.
Bu məzhəblərin tə’sisçiləri kimlərdir?
Keçən
dərslərdə qeyd olunan firqə və məzhəblər sünnülərin əsas firqələrini təşkil
edir. Bu firqələr həm İslam əqidəvi təfəkkürünün tarixinə tə’sir qoymaq
baxımından, həm də ardıcıllarının çoxluğu və ya tarix boyu uzun müddət
qaldıqlarına görə daha artıq əhəmiyyətə malikdirlər. Amma bu zaman bu cür tə’sir
və əndişəyə malik olmayan başqa firqələr də zahir olmuşdur. Bu dərsdə yalnız
qısa tanışlıq üçün həmin firqələr haqda söhbət açacağıq.
Təhaviyyə
məzhəbi Əbu Cə’fər Əhməd ibni Məhəmməd ibni Səlamət Əl-əzudi Əl-hicri
Ət-təhaviyə mənsub edilir. Təha-Ülya Misrin kəndlərindən biridir. Əbu Cə’fər
Təhavinin təvəllüd tarixi barəsində tarixçilər arasında ixtilaf vardır. Onlar
229, 230, 238, 239 kimi tarixləri qeyd etmişlər. Lakin onun ən çox ehtimal
olunanı 229-cu ildir. 321-ci ildə Misirdə vəfat edib.
Təhavi
Əbul Həsən Əş’ərinin və Əbu Mənsur Maturidinin müasiri idi və onlar kimi
Əhli-hədisin ardıcıllarından sayılırdı. Amma bildiyimiz kimi, Əş’əri və Maturidi
Əhli-hədis düşüncələrini dirçəltmək üçün onların ideoloji əsaslarına əqli daxil
etmək fikrində idilər. Bununla eyni zamanda Əhli-hədisin ideoloji əsaslarına
tənqid nəzəri ilə baxırdılar və nəticədə Əhli-hədislə müəyyən nəzərlər barəsində
ixtilafa düçar oldular. Amma o, bu iki şəxsin əksinə olaraq, yalnız Əhli-hədisin
nəzəriyyələrində mövcud olan anlaşımazlıqları aradan qaldırıb onları islah etmək
fikrində idi. Buna görə də Əhli-hədisin bütün ideoloji əsaslarını qəti və
danılmaz prinsiplər kimi qələmə verirdi və çalışırdı ki, onun əqidəvi əsaslarını
möhkəmlətsin.
Buna
əsasən Təhavi yeni bir e’tiqad ayin tə’sis etməmişdir. Hətta onun ən məşhur
kəlam risaləsi olan «Bəyanus-sünnəti vəl-cəmaəti» (o, «Əqiətu təhaviyyə» adı ilə
məşhurdur) kitabının müqəddiməsində özünün dediyi kimi, Əhli-sünnənin əqidələri,
Əbu Hənifə, Əbu Yusif və Məhəmməd Şeybaninin rə’yləri əsasındadır. Amma,
Təhavini məşhurlaşdıran şey Mö’təzilənin fəlsəfi fikirlərinin böhranlı hala
düşməsindən sonra Əhli-hədisin əqidələrini yenidən bərpa etməsidir. Demək olar
ki, Təhavi bu məzhəbi yeni bir bəyanla bir növ dirçəltmiş və çalışmışdır ki,
onun əsaslarında yaranan şəkk-şübhələri və anlaşılmazlıqları müəyyən qədər
aradan qaldırsın.
Təhavi
bir çox kitablar yazıb-yaratmışdır. O cümlədən, aşağıdakı kitabların adlarını
qeyd etmək olar:
1.
«Şərhu məanil asar»;
2.
«Şərhu muşkilu əhadisi Rəsulillah»;
3.
«Əhkamul-Qur’an»;
4.
«İxtilaful-füqəha»;
5.
«Ən-nəvadirul-fiqhiyyə»;
6.
«Əş-şurutul-kəbir»;
7.
«Əş-şurutul-ovsət»;
8.
«Şərhul-camius-səğir»;
9.
«Şərhul camiul-kəbir»;
10.
«Əl-müxtəsərus-səğir»;
11.
«Əl-müxtəsərul kəbir»;
12.
«Mənaqibu Əbi Hənifə»;
13.
«Ət-tarixul-kəbir»;
14.
«Ər-rəddu əla kitabil-müdəlləsi»;
15.
«Kitabil-fəraiz»;
16.
«Kitabul vəsayə»;
17.
«Hökmu ərazi Məkkə»;
18.
«Əqidətut-təhaviyyə».
Zahiriyyə
200, yaxud 202-ci ildə Kaşanda dünyaya gəlmiş və 270-ci ildə dünyadan getmiş
Davud ibni Əli İsfahaniyə mənsub edilən firqənin adıdır. Öz zəmanəsinin məşhur
fəqihlərindən olan Davud ibni Əli əvvəlcə Hənəfi fiqhində idi, amma Şafei
məzhəbinin fəqihlərindən çoxunun, o cümlədən Əbu Sovrun yanında bir müddət
təhsil aldığına görə Hənəfi məzhəbindən əl çəkib Şafei məzhəbinə qoşuldu.
Davud
hədislərin və Qur’anın zahiri mə’nalarına əməl etmək yönünə malik olan fiqhi
əqidəsini kəlam və əqidə çərçivəsinə saldı və etiqadi məsələlərdə əqlin və
düşüncənin rolunu ümumiyyətlə inkar etdi. O, inanırdı ki, ayələrin və hədislərin
zahirindən əldə olunanları (dərk etdikləri) qəbul etmək və onlara inanmaq
lazımdır. Deyilmişdir ki, zahiriyyə ideologiyası batiniyyə hərəkatının
qarşısında yaranmışdır. O zaman şiələrin arasında batiniyyə adı ilə məşhur olan
bir ideoloji cərəyan formalaşmışdı. Çünki onlar inanırdılar ki, şəriətin zahiri
hökmlərinin hamısı (istər Qur’an ayələri, istərsə də rəvayətlər) müəyyən batini
mə’nalara malikdir və batini mə’nalarda dərindən düşünərək onları yozmaq və
həqiqəti kəşf etmək lazımdır. Bu ideoloji cərəyanda yunan fəlsəfəsinin təfəkkür
prinsipləri mövcud olduğundan, sünnü alimləri onu bid’ətçi bir cərəyan kimi
dindən xaric hesab edirdilər. Bu cərəyan xüsusilə Mə’munun xilafəti dövründə
(h.q.198-218) çox güclü idi və İran, İraq, Qərbi Hindistandan başlayaraq, Əmman
və Şimali Afrikaya qədər olan geniş İslam ərazilərində yayılmışdır.
Belə
bir şəraitdə Zahiriyyə təfəkkürü batinçilərin təfəkkürünü rədd etmək üçün
yaranmışdır. Onlar İslami əqidə prinsiplərində hər növ fəlsəfə və əqlin
dəxalətini rədd etməklə, onların zahirlərinə əməl etməyi, şəriətin zahirinə
əqidə bağlamağı caiz bilirdilər.(Miyan Məhəmməd Şərif, «Tarix və fəlsəfə dər islam», 1-ci cild.)
Zahiriyyəçilər
şəriətin zahiri hökmlərini əxz etmək məsələsində o qədər ifrata varmışdılar ki,
ilahi hökmlərin kəşf edilməsində ictihadı belə inkar edirdilər. Zahiriyyəçilər
bu əqidədə Ən’am surəsinə 38-ci ayəsinə istinad edirdilər. Buna görə də
inanırdılar ki, hər bir şey Allahın kitabında zikr olunubdursa, onun barəsində
ictihada yer qalmır və Allahın kitabının zahirinə əməl etmək kifayətdir.
Hədislərin
və ayələrin zahiri mə’nalarını əxz (əməl) etmək nəticəsində ilkin Əhli-hədisin
ideoloji bünövrələrində mövcud olan nəticələrdən başqa bir şey hasil olmadı.
Yə’ni, onlar Allah-taala barəsində istər-istəməz təşbih və təcsim əqidəsinə
gəlib çıxırdılar.
Cəhm
ibni Səfvan Səmərqəndi ardıcıllarına Cühəmiyyə firqəsi deyilir. O, 128-ci hicri
ilində vəfat etmişdir.
Cühəmiyyənin
müstəqil bir firqə şəkilinə düşüb sair firqələrdən ayrı qeyd olunmasının səbəbi
onlar tərəfindən irəli sürülən beş nəzərdir:
1.
Mütləq şəkildə cəbrə inanmaq; Cühəmiyyəçilər inanırdılar ki, insan heç bir şeyə
qadir deyildir və istitaət vəsfi onun üçün işlədilə bilməz, əksinə o, bütün
işlərdə məcburdur, onun fe’llərini icad edən də məhz Allahdır. Eləcə də, sair
varlıqların fe’llərini, istər bitkilərin, istər heyvanların, istər cansızlara
aid olan işləri Allah xəlq edir. Fe’llər məcazi mə’nada məxluqa aid edilir.
Məsələn, ağacın meyvə verməsi, suyun axması, daşın diyirlənməsi və s.
2.
Tə’til; Cühəmiyyə bütün sifətləri Allahdan inkar edir və inanırdılar ki, Allahı
məxluqatın vəsf edildiyi sifətlərlə vəsf etmək olmaz.
3.
Allah elminin hadis olması; Cühəmiyyəçilər Allahın elmini hadis bilir, amma,
deyirlər ki, bu, sair varlıqların vəsf edildiyi bir tərzdə deyil.
4.
İman və küfr; Cühəmiyyəçilər inanırdılar ki, iman Allah barəsində mə’rifət kəsb
etmək mə’nasınadır. Bunu dildə demək də lazım deyildir. Küfr də Allah barəsində
cahil olmaq mə’nasınadır.
5.
Behişt və cəhənnəm. Cühəmiyyəçilər behişt və cəhənnəmin əbədi olmasını inkar
edərək deyirdilər ki, insanlar behiştdə Allahın ne’mətlərindən faydalanıb,
cəhənnəm əhli cəhənnəm əzabına düçar olduqdan sonra hər bir şey (behişt və
cəhənnəm) aradan qalxacaqdır.
Bu
firqənin üzvləri 255-ci hicri ilində vəfat etmiş Məhəmməd ibni Kiram Sistaniyə
mənsub edilir. Kiramiyyə təfəkkürünün əsası təcsim üzərindədir. Onlar Allahın
cism olmasına inanırlar. Onlar hədd, son, cəhət və s. bu kimi şeyləri Allaha aid
edir və həmçinin Allahı hadislərin hülul etdiyi yer hesab edirlər. Onlar
deyirlər ki, Allahın sözü, iradəsi və idrakı hadis olmuşdur və Allah bu
hadisələrin hülul etdiyi yerdir.
Bunu
da qeyd etmək lazımdır ki, sonuncu iki firqə dində icad etdikləri çoxlu
bid’ətlər və inhirafçı nəzəriyyələr səbəbi ilə sünnü alimləri tərəfindən rədd
edilmiş və onların əqidələri bid’ət və zəlalət kimi tanıtdırılmışdır.
1.
Təhaviyyə məzhəbinin Maturidiyyə və Əş’ərilərlə olan fərqi nədir?
2.
Təhavi Əhli-hədis məzhəbinə nə kimi xidmətlər etdi?
3.
Zahiriyyə məzhəbinin əsas nəzəriyyələri nədir?
4.
Zahiriyyə ilə batiniyyə məzhəblərinin fərqi nədir?
5.
Cühəmiyyə təfəkkürünün ən mühümlərini bəyan edin.
6.
Nə üçün Kiramiyyə firqəsi bid’ət və zəlalətlə ittiham olundu? |