Musa ibn Əbdi Rəbih deyir: "Atası Əli sağ olarkən Peyğəmbər məscidində Hüseyndən belə eşitdim: Allahın rəsulu belə buyurdu: "Agah olun ki, əhli-beytim sizin üçün əmin-amanlıq səbəbidir. Mənə məhəbbətə xatir onları dost tutun, onlara sarılın ki, yolunuzu azmayasınız.” Soruşuldu ki, sənin Əhli-beytin kimlərdir? Buyurdu: "Əli, mənim iki nəvəm və Hüseyndən olan doqquz övlad əmin imamlar və məsumlardır. Agah olun ki, onlar mənim ətimdən və qanımdan olan əhli-beytimdir.”("Kifayətul-əsər”, 170; "Biharul-ənvar”, 36-341, bab 41, hədis 207 ) Aydın oldu ki, Quran və sünnəyə əsasən Əhli-beyt (ə) on iki məsum imamdır. Onlara itaət vacib edilmişdir. Onların imaməti qəbul olunmalı, həqiqi İslam onlardan öyrənilməlidir. Aydın dəlillərlə bəyan olunur ki, Əhli-beyt (ə) çox saylı rəvayətlərə əsasən, eləcə də müxtəlif firqə kitablarında bəyan olunduğu kimi Əmirəl-möminin Əli (ə), həzrət Fatimə (s), imam Həsən (ə), imam Hüseyn (ə) və imam Hüseynin (ə) doqquz məsum övladıdır. Əməvi və abbasi hakimlərinin təsiri altında olan təhrifçilər elm libası geyərək bu zalım rejimlərin qanuniliyini sübut etməyə çalışmışlar. Onlar hakimlərin istəyi ilə dini həqiqətləri təhrif etmişlər. Aşiqlər heç vaxt, heç bir qiymətə Əhli-beyt (ə) vilayətindən, onlara iqtidadan, əzadarlıqlarına göz yaşı axıtmaqdan dönəsi deyillər.

Məntiq elmində "Müərrif” bəhsində məntiq əhli yekdil olaraq deyir: Həqiqəti tanıtdıran şəxs (müərrif) haqq mənbəyə (müərrəfə) bağlı olmalıdır ki, həqiqəti açıqlaya bilsin.

Əhli-beytin (ə) imaməti sübuta yetdikdən sonra bilməliyik ki, varlıq aləmində Allah-təaladan sonra Əhli-beytdən (ə) başqa həqiqəti tanıtdıracaq ikinci etibarlı qaynaq yoxdur. Əhli-beytin (ə) özünü tanımaq üçün də onların özünə müraciət etməkdən başqa çarəmiz yoxdur. Çünki onları kimsə lazımınca tanımaq gücündə deyil. Bütün təriflər naqisdir və Əhli-beyti (ə) müstəqil şəkildə tanımaq mümkünsüzdür.

Öncə deyilənlərdən aydın oldu ki, Əhli-beyti (ə) tanımaq zəruridir və bu tanışlıq qurtuluş, Allaha yaxınlıq səbəbidir. Əhli-beti (ə) tanımadan həqiqi İslamı tanımaq, qurtuluş yolunu müəyyənləşdirmək mümkünsüzdür. Məsələ ciddi olduğundan daha bir neçə rəvayəti yada salaq.

Əmirəl-möminin (ə) buyurur: "İnsanların ən xoşbəxti o kəsdir, bizim üstünlüklərimizi bilsin, bizim vasitəmizlə Allaha yaxınlıq sorağında olsun, bizə məhəbbətini xalisləşdirsin. Xoşbəxtlik axtaran bizim dediklərimizə əməl etməli, qadağalarımızdan çəkinməlidir. Belə bir şəxs bizdəndir və əbədi behiştdə bizimlə olacaq.”("Ğurərul-hikəm”, 115 )

Zərə deyir: İmam Sadiqdən (ə) soruşdum ki, Allaha mərifətdən sonra ən üstün əməl nədir? Həzrət buyurdu: "Allahı tanıdıqdan sonra namaza bərabər bir əməl yoxdur. Namazdan sonra ən üstün əməl zəkatdır. Bu əməllərdən sonra isə ən üstünü oruc tutmaqdır. Sadalanan əməllərdən sonra Həccə bərabər olan əməl yoxdur. Bütün bunların başlanğıcı və sonu bizi tanımaqdır.”(Tusi, "Əl-əmali”, 694... )

Bəli, namazı, zəkatı, orucu, həcci və doğru yolu Əhli-beytdən (ə) öyrənməliyik. Çünki Quran onların evində nazil olmuşdur və onlar peyğəmbərin elminə varis olanlardır. Bu bilikləri onları, onların maarifini, göstərişlərini və hökmlərini tanımadan əldə etmək mümkünsüzdür.

Həzrət Peyğəmbər (s) buyurmuşdur: "Allah kimə Əhli-beytimə (ə) mərifət və onların vilayətini əta etmişsə, şübhəsiz, bütün xeyirləri vermişdir.”(Bəşarətul-Müstəfa”, 176; Səduq, "Əl-əmali”, 474... )

Əbu Bəsir nəql edir ki, imam Sadiq (ə) "Bəqərə” surəsinin 269-cu ayəsi haqqında buyurmuşdur: "Kimə hikmət verilmişsə, şübhəsiz, ona böyük xeyir verilmişdir...” Rəvayət olunur ki, imam buyurur: "(Hikmət verilən şəxsə, şübhəsiz, böyük xeyir verilmişdir və bu xeyir) Allaha itaət və imamı tanımaqdır.”(Kafi”, 1-185, "Mərifətul-imam” babı, hədis 11; "Əl məhasin”, 1-48, bab 19, hədis 60; "Biharul-ənvar”, 1-215, bab 6, hədis 22 )

İstər maddi, istər mənəvi, istərsə də maddi-mənəvi baxımdan varlıq aləmindəki mövcudlar arasında ən üstün olan Əhli-Beytdir (ə).

İstənilən baxımdan üstünlük səbəbi ya Allahın seçimi, ya Onun diqqəti, ya kamil iman və əməl, ya da bizə qaranlıq qalmış bir amildir. Mövzunu aydınlaşdırmaq üçün hər üç yönümdən ən üstün nümunələri nəzərdən keçirək.

Qurani-Məcid və rəvayətlərə əsasən, məkanlar arasında Allah üçün möhtərəm yerlər var və bu yerlərin ehtiramını pozmaq qadağandır. Bu yerlər başqa yerlərdən seçilir və insan üçün həmin yerlərdə ibadət müqabilində böyük mükafat nəzərdə tutulmuşdur.

Kəbənin yerləşdiyi torpaq parçası Allah tərəfindən seçilmişdir və bu seçim həmin yerə xüsusi üstünlük verir, onu başqa məkanlardan fərqləndirir. İmam Sadiqdən (ə) belə rəvayət olunur: "Allah hər şeydən bir şey seçmişdir və məkanlar arasından seçilən Kəbədir.”("Mən la yəhzuruhul-fəqih”, 2-243; "Vəsailuş-şiə”, hədis 17649 ) Allahın əmri ilə seçilmiş bu yerdə tikilən ilk ev Kəbədir. Qurani-kərimdə buyurulur: "Şübhəsiz, insanlar üçün seçilmiş ilk ev Məkkədəki evdir. O ev bərəkətlidir və insanların hidayət vasitəsidir. Orada aydın nişanələr var. İbrahim məqamı bu nişanələrdəndir. Oraya daxil olan amandadır...”("Ali-İmaran”, 96, 97 )

İmam Sadiq (ə) buyurur: "Məkkəyə üz tutub onun haqq və hörmətini tanıyan şəxs oradan çıxanadək günahları Allah tərəfindən bağışlanar, onu narahat edən dünya və axirət işləri sona yetər.”("Vəsailuş-şiə”, 13-242, bab 18, hədis 17652 )

Qurani-Məcid insanların diqqətini Qədr gecəsi, zil-hiccənin ilk on günü, "əyyamullah” kimi zamanlara yönəldir. İnsan bu misilsiz fürsətlərdən faydalanaraq böyük mükafat ləyaqəti əldə etməlidir.

«Təfsiri-Safi»də İbn-Abbasdan belə nəql olunur: Həzrət Peyğəmbərə (s) Allaha xatir cihad üçün min ay çiynində silah gəzdirən Bəni-İsrailli bir şəxs haqqında danışdılar. Peyğəmbər (s) heyran qaldı və arzu etdi ki, onun da ümmətindən beləsi çıxaydı! Həzrət (s) dua üçün əl açdı və dedi: "Pərvərdigara, mənim ümmətimi ömür baxımından ən qısa ömürlü, əməl baxımından ən az əməlli qərar verdin...” Mehriban Allah Qədr gecəsini əta edib buyurdu: "Ən az vaxtı əhatə edən Qədr gecəsi xeyir əməl üçün Bəni-İsrailli kişinin min ayından üstündür. Sənin üçün, səndən sonra ümmətin üçün Qiyamətədək ən üstün vaxt Qədr gecəsidir.”("Məcməül-bəyan”, 10-665; "Təfsirus-Safi”, 5-352 )

Qədr gecəsində dua, istiğfar, Quran qiraəti, elmi mübahisə, müstəhəb namaz, oyaq qalmaq, imam Hüseynin ziyarəti min ayda görülən işdən üstün savaba malikdir.