İYİRMİNCİ DƏRS
1.
Vəhhabiliyin əsas e’tiqadi üsulları hansılardır?
2.
Şəfaət barəsində vəhhabilərin nəzəri nədir?
Əslində
İbni Teymiyyənin əqidəsi olan vəhhabi əndişəsi əsasən tövhidlə şirkin arasında
müəyyən bir sərhəd tə’yin etməklə əlaqədardır. İbni Teymiyyə və onun
ardıcıllarının fikrincə, müsəlmanların arasında çoxlu şirk növləri, xüsusilə
ibadətdə olan şirk nüfuz etmiş və onları tövhiddən uzaq salmışdır. Buna görə də
İslami cəmiyyətlərdə yayılmış müxtəlif şirk nümunələrini üzə çıxarıb onu
başqalarına da tanıtdırmaq lazımdır. Əməl məqamında da bu kimi təzahürlərlə
ciddi mübarizə aparılmalıdır.
Tövhid
və şirk məsələsi İslamda ən mühüm e’tiqadi məsələlərdən birdir. Çünki İslam
tövhid dini olduğu üçün şirki qadağan edir. Bütün İslami məzhəblər bu nəzərdə
yekdil fikrə malik olub, özlərini müvəhhid (təkallahlı) hesab edirlər. Amma
ayrı-ayrı vaxtlarda müsəlmanlar arsında bə’zi şəxslər tapılmışdır ki, bə’zi
firqələrin əqidə və rəftarlarını şirklə qarışmış hesab etmişlər. İbni Teymiyyə,
İbni Əbdül Vəhhab və onların ardıcılları bu barədə ifratçı nəzəriyyələr irəli
sürərək öz müasirlərinin hamısını şirkdə ittiham etmişlər. Onlar öz fikirlərini
isbat etmək üçün müsəlmanların əməl və rəftarlarından bir çoxunu öz müddəalarına
şahid gətirərək, şirk nümunələrini rədd etməyə çalışmışlar.
İbni
Teymiyyə deyir: «Peyğəmbərlərin risalətində çatdırılmalı olan tövhid prinsipi,
ilahilik prinsipini yalnız Allaha məxsus edir; yə’ni bəndə şəhadət verir ki,
Allahdan başqa heç bir mə’bud yoxdur. Nəticədə Allahdan başqa heç kəsə pərəstiş
və heç nəyə təvəkkül etməməli, Onun xatirinə olmadıqda heç bir şəxsi sevməməli,
Onun xatirinə olmayan heç bir kəslə düşmənçilik etməməli və heç bir iş Onun
razılığı olmadan yerinə yetirilməməlidir.
Bu
deyilənlərin hamısı Qur’anda Allahın Özü üçün isbat etdiyi tövhidi əhatə
edir.
Buna
əsasən, sadəcə olaraq Allahın vahid olmasına e’tiqad bəsləmək, yaxud vahid
Allahın dünyanın xaliqi olduğuna inanmaq, həmçinin Allahın sifətlərini e’tiraf
etmək və Onu eyblərdən pak bilmək, tövhid sayılmayacaq. Yalnız o vaxt tövhid
sayıla bilər ki, Allahdan başqa heç bir mə’budun olmamasına, yalnız Allahın
pərəstişə layiq olmasına şəhadət versin».
İbni
Teymiyyə və onun ardıcılları inanırdılar ki, Allahdan başqasından kömək istəyib,
onun qarşısında kiçilmək, Peyğəmbər (s) və övliyalardan şəfaət diləmək,
imamların və peyğəmbərlərin qəbirlərini ziyarət etmək, onların məqbərələri
qarşısında qurbanlıq kəsib, nəzir etmək və namaz qılmaq, onlara təvəssül etmək,
övliyaların qəbirləri üzərində hər hansı bir bina inşa etmək və s... tövhidlə
ziddir və şirkin aşkar nümunələrindən sayılır.
İndi
isə İbni Teymiyyənin və ümumi şəkildə vəhhabi məzhəbinin müsəlmanların tövhidlə
zidd olan, şirk və küfr sayılan əməl və əqidələri barədə irəli sürdükləri
nəzərləri araşdırırıq.
Vəhhabilərin
nəzərində şirkin bariz nümunələrindən biri hesab olunan ən mühüm məsələ
peyğəmbərlər və övliyalardan şəfaət diləməkdir. Onların əqidəsinə görə, Allah
övliyaları və peyğəmbərlərinin dünyada şəfaət etməsinin heç bir tə’siri yoxdur,
bu yalnız axirətdə, özü də yalnız Allahın izni ilə mümkündür. Buna əsasən
bəndələrin özləri ilə Allah arasında müəyyən şəxsləri vasitəçi qərar verib onlar
üçün şəfaət etməsini istəməsi şirkdir və Allahdan başqasına ibadət hesab olunur.
Buna görə də bəndələr yalnız Allaha dua edərək belə deməlidirlər: Pərvərdigara!
Bizim peyğəmbərimiz Məhəmmədi (s) və ya Özünün sair saleh bəndələrini, yaxud
mələkləri qiyamət günündə bizim şəfaətçimiz qərar ver.
Lakin
bizim «Ey Allahın Rəsulu! (yaxud) Ey Allahın vəlisi, səndən istəyirəm ki, mənim
barəmdə şəfaət edəsən» - yaxud buna oxşar cümlələr deməyə haqqımız yoxdur.
Çünki, Allahdan başqa heç kəsin şəfaət etmək qüdrəti yoxdur. Deməli, əgər
hal-hazırda bərzəx aləmində olan Peyğəmbərdən belə bir şey istənilsə, şirk hesab
olunacaqdır».(Məhəmməd ibni Əbdül Vəhhab, «Əl-hədiyyətu səniyyə».)
Vəhhabilər
bu əqidələri əsaslandırmaq və doğrultmaq üçün aşağıdakı Qur’an ayələrinə istinad
edirlər:
Allah-taala
buyurur:
«Şübhəsiz
ki, (bütün) məscidlər Allaha məxsusdur. Allahdan başqa heç kəsə ibadət etməyin.» (Cinn‒18.)
Buna
görə də Allah dərgahından başqa heç bir yerdə səcdə və ibadət olmaz.
Əgər
duada hər hansı bir şəxsi Allahla şərik etsək, şirkə mübtəla olarıq.
Başqa
bir ayədə şəfaət yalnız Allahın izn və icazəsi ilə
mümkün
hesab edilmişdir.
«Kim
Allah yanında Onun icazəsi olmadan şəfaət edə bilər?!» (Bəqərə‒255.)
Digər
bir yerdə Allah-taala buyurur:
«Onlar
yalnız Allahın razı olduğu şəxslər üçün şəfaət edərlər, başqası üçün yox».(Ənbiya‒28.)
Buna
əsasən razılığı Allahın Özündən tələb etmək lazımdır.
Başqa
bir ayədə isə belə oxuyuruq:
«Qiyamət
günündə Allah tərəfindən peymanı alınan şəxslərdən başqa heç kəs şəfaətə nail
olmaz».(Məryəm‒87)
Deməli,
şəfaət Allahın izni ilədir, özü də Qiyamət günündə olacaqdır.
Birinci
məsələ:
İlahi
övliyaların və peyğəmbərlərin şəfaəti Allah dərgahında dua və yalvarışdan başqa
bir şey deyildir. İlahi övliyalar Allah dərgahında malik olduqları yüksək məqam
sayəsində günahkar insanların barəsində dua etdikləri zaman, Allah tərəfindən
daha tez qəbul olunur və həmin günahkar şəxs ilahi məğfirət və rəhmətə nail
olur. Buna əsasən şəfaət, dua və istiğfar mə’nasında olsa, nəinki ilahi
övliyalardan, hətta hər bir mö’min şəxsdən dua etməsini xahiş etməkdə kim şübhə
edə bilər? Adi bir müsəlman Peyğəmbəri-Əkrəmdən (s), yaxud sair ilahi
övliyalardan şəfaət istəyirsə, həqiqətdə hacət tələb etmir, əksinə onun
barəsində istiğfar və dua etməsini xahiş edir.
Başqa
sözlə desək, ondan istəyir ki, Allah dərgahında olan məqamına diqqət yetirməklə,
Allahın əvəzində onun hacətini yerinə yetirib günahlarını bağışlanmasını deyil,
Allahdan onun üçün istiğfar edib onun hacətini istəməsini diləyir. Bu o haldadır
ki, Allah-taala Qur’ani-kərimdə Peyğəmbərdən (s) istəyir ki, özü və mö’minlər
üçün Allahdan məğfirət və bağışlanmaq istəsin.
«(Ya
Məhəmməd!) Bil ki, Allahdan başqa heç bir tanrı oxdur. (Ondan) həm öz
günahlarının, həm də mö`min kişilərin və qadınların günahlarının bağışlanmasını
dilə...» (Məhəmməd‒19.)
Allah-taala
başqa bir ayədə və’də verir və buyurur ki, əgər Peyğəmbər günahkarlar üçün
məğfirət və bağışlanmaq istəyərsə, Allahın tövbə qəbul edən və rəhimli olduğunu
görərlər.
«Əgər
özlərinə zülm edən kəslər sənin yanına gələrək bağışlanmaq istəsələr və
Peyğəmbər (s) də onlar üçün bağışlanmaq istəsə, Allahın tövbələri qəbul edən və
mehriban olduğunu görərlər.»(Nisa‒64.)
Əgər
şəfaət istəyən şəxs şəfaət edəndən yalnız Allahın öhdəsində olan bir işi
istəyərsə, bu düzgün ola bilməz. Çünki şəfaət istəyən, şəfaət edən şəxsdən onun
hacətinin rəva olunmasını deyil, yalnız onun barəsində dua etməsini
istəyir.
İkinci
məsələ:
«Duada
Allahla yanaşı bir kəsi çağırmayın» - deyilməsinin səbəbi budur ki, Allah-taala
Özü bu işi qadağan etmişdir Bu söz də rədd olunur, çünki şəfaət, şəfaət edənlə
şəfaət olunanın dua və istəyində yanaşı olmasıdır. Çünki «şəfi’» cüt
mə’nasınadır. Yə’ni, insan öz hacətinin rəva olunmasında özünü müqabil tərəfə
yanaşdırır ki, onunla müştərək şəkildə Allahdan hacətini istəsin. Buna əsasən,
şəfaət Allah-taaladan istənilən bir dua və hacətdir. «Şəfi’» Allahdan dua edərək
istəyir, nəinki dua edən duada bir kəsi Allahla şərik edir. Deməli, əgər ayəyə
diqqət edilsə aydın olacaqdır ki, bəndə dua edən zaman Allahdan başqasını Ona
şərik etsə, bu iş qadağan edilmişdir. Məsələn, əgər bir kəs «Ya Rəsuləllah!
Səndən və Allahdan istəyirəm ki, mənim günahımı bağışlayasınız» - desə, bu halda
Peyğəmbəri də öz duasında Allahla şərik etmişdir. Halbuki, şəfaət diləyən şəxs
sadəcə olaraq Peyğəmbərdən (yaxud başqa bir ilahi övliyadan) onun barəsində dua
etməsini və Allahdan onun üçün bağışlanmaq istəməsini diləyir.
Üçüncü
məsələ:
Əgər
Allah-taala şəfaət icazəsini və bu işə ləyaqəti Peyğəmbərə və sair ilahi
övliyalara vermişsə, onlardan şəfaət istənilməsinin caiz olmaması (qadağan
olması) necə mümkün ola bilər?! Halbuki, Allah-taala Qur’ani-kərimdə Peyğəmbərə
buyurur:
«Onların
barəsində dua et, çünki sənin duan onların qəlblərinə aramlıq bəxş edir».(Tövbə‒103.)
Başqa
bir ayədə buyurulur:
«Bir
kəs başqasının barəsində yaxşı şəfaət edərsə, şəfaətdən onun da bir nəsibi, payı
olacaqdır».(Nisa‒85.)
Əgər
bir mö’minin başqa bir mö’min barəsində yaxşı şəfaəti caizdirsə, mö’mindən
şəfaət və dua istəməsi də caiz olacaqdır. Əgər şəfaət istəmək qadağan bir iş və
ya şirk olsaydı, şəfaətə icazə verilməsi də əbəs bir iş olacaqdı.
Dördüncü
məsələ:
Vəhhabilər
inanırlar ki, Allah bütpərəstləri ona görə müşrik və kafir kimi təqdim etmişdir
ki, onlar bütləri Allah yanında şəfaətçi bilərək deyirdilər:
«Biz
bu bütlərə ona görə pərəstiş edirik ki, bizi Allah dərgahına
yaxınlaşdırsınlar».(Zümər‒3.)
Buna
görə də Allahdan başqasını vasitəçi və şəfi’ qərar vermək şirk və küfr hesab
edilmişdir. Amma bunun cavabında deyilməlidir ki, Peyğəmbərin şəfi qərar
verilməsi bütlərin şəfaətçi qərar verilməsi ilə tamamilə fərqlənir. Çünki
bütpərəstlər bütləri Allaha yaxınlaşmaq üçün bir vasitəsi qərar verərək onlara
pərəstiş edirdilər. Belə ki, Qur’an aşkar şəkildə bu məsələni çatdırır. Halbuki,
şəfaət istəyən şəxs şəfaət edənə pərəstiş etmir.
Beşinci
məsələ:
Müsəlmanlardan
heç biri (hətta vəhhabilərin özü belə) Peyğəmbərin və ilahi övliyaların şəfaət
etmə haqqına malik olduqlarını inkar etmirlər. İndi biz soruşuruq ki, günahların
bağışlanması üçün şəfaətçi olan şəxs Allahla şərikdir, yoxsa günahların
bağışlanmasında şəfaət olunan şəxslə şərikdir?
Aydındır
ki, birincini qəbul etmək olmaz. Çünki o, şirkdən başqa bir şey deyildir. İkinci
qism də sair müsəlmanların e’tiqad bəslədiyi bir məsələdir. Bundan əlavə, dünya
ilə axirət arsında fərq qoymaq və yalnız axirətdə şəfaətə inanaraq dünyada onu
inkar etmək düzgün ola bilməz. Çünki, əgər dünyada şəfaət istəmək və şəfaətin
özü şirkdirsə, axirətdə də şirk olacaqdır.
Altıncı
məsələ:
Vəhhabilər
deyirlər: Peyğəmbər (s) dünyadan gedib bərzəx aləmində olduğuna görə, ondan
şəfaət istəməyin heç bir tə’siri ola bilməz. Bu iddianın cavabı bundan ibarətdir
ki, o həzrətdən, yaxud hal-hazırda dünyadan getmiş ilahi övliyalardan şəfaət
istəmək həqiqətdə onların cismlərindən yox, onların yüksək məqamda olan
ruhlarından şəfaət istəməkdir; bir çox Qur’an ayələrindən aydın olur ki, insanın
həyatı öldükdən sonra da davam edir. O cümlədən «Ali-İmran» surəsinin
169‒170-ci, «Bəqərə» surəsinin 154-cü, «Mu’minun» surəsinin 46-cı ayələri buna
misaldır.
1.
Vəhhabilər tövhidi necə tə’rif edirlər?
2.
Vəhhabilərin şəfaət barəsindəki nəzəri necədir?
3.
Vəhhabilərin şəfaət istəməyin müşriklik olması barəsində olan dəlilləri
nədir?
4.
Şəfaətin tə’rifini deyin.
5.
Şəfaətin tə’rifinə diqqət yetirməklə, vəhhabilərin dəlillərini araşdırın.
6.
Bütpərəstlər tərəfindən bütlərin vasitə qərar verilməsi ilə müsəlmanlar
tərəfindən Peyğəmbər və ilahi övliyaların şəfaətçi qərar verilməsi arasında nə
kimi fərq vardır?
7.
Qur’an ayələrinə əsasən, ilahi övliyalardan diri olduqda və ya ölümlərindən
sonra şəfaət istəməyin fərqi vardırmı?
İYİRMİ
BİRİNCİ DƏRS
1.
İlahi övliyalara təvəssül etmək tövhid əqidəsi ilə uyğun gəlirmi?
2.
Təvəssül barəsində vəhhabilərin nəzəri necədir?
Vəhhabilər
şəfaət məsələsi ilə yanaşı Peyğəmbər və övliyalara təvəssül etməyə də irad
tutaraq iddia edirlər ki, bu əməl bid’ət və şirkdir. Vəhhabilər bu əqidələrini
aşağıdakı kimi əsaslandırırlar:
Əvvəla:
Əgər təvəssül məsələsi qanuni və düzgün olsaydı, Allah-taala onu bəyan edər
və camaatı bu işə rəğbətləndirərdi. Caiz olduğu halda Allahın belə bir mühüm işi
bəyan etməməsi yolverilməzdir; deməli, belə bir iş şər’i nöqteyi-nəzərdən caiz
deyildir.
İkincisi:
Allah-taala Qur’ani-kərimdə(«İsra» surəsi, 56‒57-ci ayələr.) müşriklərin əməllərinə irad tutub
buyurur ki, onlar heç bir ziyan və faydaya malik olmayan bütlərə təvəssül
etmişlər; belə dualar onları heç bir yerə çatdırmaz. Çünki onlar Allaha doğru
gedən yolu itirmişlər.
Üçüncüsü:
Əgər vasitə qərar vermək zərərin dəf edilməsi və ya mənfəət əldə edilməsi
üçün olarsa, məsələn Peyğəmbəri (s) və ya övliyanı ruzi qazanmaqda vasitə qərar
versələr, bu özü ən böyük şirkdir.(Məhəmməd Nəsib Rifa’i, «Ət-təvəssülü ila həqiqətit-təvəssül».) Yuxarıda qeyd olunan mətləblərdən
belə bir nəticə alınır ki, Allah-taala peyğəmbərlərə və övliyalara təvəssül
etməklə əlaqədar heç bir söz buyurmadığından, vəhhabilər bu əməli bid’ət hesab
edirlər. Çünki müşriklər başqalarını və bütləri Allaha pərəstiş etməkdə və ilahi
fe’llərdə vasitə qərar verdikləri üçün şirk sayılmışdı. Bu barədə vəhhabilərin
digər bir nəzəri də budur ki, təvəssül olunan ilahi övliyaların və
peyğəmbərlərin hamısı dünyadan getdiklərinə görə, onların heç biri tə’sir
mənşəyi ola bilməz. Onlar bu barədə «Fatir» surəsinin 14-cü ayəsinə istinad
edirlər. Belə ki, Allah-taala buyurur:
«Allahın
yerinə çağırdığınız şəxslər heç bir şeyə malik deyillər. Əgər onları çağırsanız
sizin duanızı eşitməzlər, əgər eşitsələr də sizin istəklərinizi həyata keçirə
bilməzlər. Onlar qiyamət günündə sizin şirkinizdən bizarlıq edəcəklər. Alim
Allah qədər heç kəs səni həqiqətdən agah etməz.»(İbni Teymiyyə, «Minhacus-sünnə».)
Vəhhabilərin
nəzəriyyəsini araşdırarkən üç əsas mehvərdə bəhs aparmaq olar:
Birincisi:
Görəsən şəriətdə (kitab və sünnədə) təvəssül məsələsi mövcuddurmu?
İkincisi:
Peyğəmbərə (s) və övliyalara təvəssül etmək müşriklərin əməli ilə
eynidirmi?
Üçüncüsü:
Övliya və peyğəmbərlər vəfatlarından sonra tə’sir mənşəyi ola
bilməzlərmi?
Bu
üç mehvər ətrafında bəhsə başlamazdan əvvəl təvəssülün mahiyyət və tə’rifi ilə
tanış olmalıyıq.
«Təvəssül»
müəyyən bir hədəfə çatmaq üçün bir şeyi vasitə seçmək mə’nasınadır. Məsələn,
ərəb dilində «Təvəssələ iləllahi bi əməlin» (yə’ni, «bir nəfər müəyyən bir iş
vasitəsi ilə Allah dərgahına yaxınlaşdı») deyilər. Buna əsasən əgər insan hər
hansı bir məqsəd və hədəfə çatmaq üçün bir şeyi və ya şəxsi vasitə qərar versə,
«hədəf və məqsədə çatmaq üçün o şəxsə, yaxud o şeyə təvəssül etdi»
deyilər.
Buradan
aydın olur ki, həm insan, həm də sair canlı varlıqlar öz hədəflərinə çatmaq üçün
daim müəyyən şəxslərə və yaxud əşyalara təvəssül edirlər.
İnsan
gündəlik həyatında aclığını dəf etmək üçün qidaya, susuzluğunu dəf etmək üçün
suya, xəstəliyini dəf etmək üçün həkimə, dərmana və ya müalicəyə ehtiyaclı olur;
bunların vasitəsi ilə öz məqsədinə nail olmağa çalışır. Bu kimi minlərlə nümunə
göstərmək olar ki, insanın və sair canlıların həyatını onlarsız təsəvvür etmək
mümkün deyildir. Deməli, həyatda hər hansı bir səbəbin vasitə qərar verilməsini
şirk hesab etmək olmaz. Amma, əgər səbəb və vasitələrin müstəqil təsir qüvvəsinə
malik olduğuna inansaq, təbiidir ki, şirkə düçar olmuş olacağıq. Amma
Allah-taalanın bu kimi vasitələrə tə’sir bəxş etdiyinə və onların insanın
ehtiyaclarını tə’min etmək üçün sadəcə bir şey olduğuna inansaq, onda bunun şirk
olmasını necə iddia etmək olar?! Allah-taala təkvin aləmində bizim üçün müəyyən
vasitələr müəyyən etmiş və insanı fitri və təkvini olaraq, öz hədəf və
məqsədlərinə çatmaq üçün vasitə seçmək məcburiyyətində qoymuşdur. Peyğəmbərlərə
və övliyalara təvəssül etmək bəhsində də yalnız Allah-taalanın bu böyük
şəxsiyyətləri, yaxud onların müqəddəs ruhlarını vasitə qərar verib-vermədiyini
araşdırmaq lazımdır. Çünki, həyatda insanın vasitələrdən faydalanmaq məsələsinin
qaçılmaz bir iş olduğunu kimsə inkar edə bilməz. Burada mübahisə mbvzusu xüsusi
olaraq, müəyyən şəxslərə təvəssül etməyin düzgün olub-olmamasındadır. İndi isə
yuxarıda qeyd olunan üç mehvəri araşdırırıq:
Birinci
mehvər: Allah-taala «Maidə» surəsinin 35-ci ayəsində bəndələri Öz dərgahına
yaxınlaşmaq üçün vəsilə (vasitə) seçməyə rəğbətlənidirir və onları bu işə də’vət
edərək buyurur:
«Ey
iman gətirənlər! İlahi təqvaya malik olun və Ona çatmaq yolunda vəsilə seçin.
Allah yolunda çalışın, bəlkə nicat tapasınız».
Bununla
da təvəssülün, Allah dərgahına qovuşmaq üçün vasitə qərar verməyin düzgün bir iş
olmasında heç bir şəkk-şübhə yeri qalmır.
İBADƏTLƏR VƏ SALEH
ƏMƏLLƏR
Təqva
və pərhizkarlıq Allah dərgahına yaxınlaşmaq vasitələrindən biridir. Amma
peyğəmbərlər və ilahi övliyalara təvəssül etmək barədə Peyğəmbəri-Əkrəmdən (s)
nəql olunan çoxlu rəvayətlərdə o Həzrət (s) səhabələri sair peyğəmbərlərə və
saleh insanlara təvəssül etməyə də də’vət edir. Aşağıdakı iki rəvayət bu
mövzunun şahididir:
1.
Osman ibni Hüneyf bir neçə vasitə ilə belə rəvayət edir ki, bir nəfər kor kişi
Peyğəmbərin (s) yanına gəlib ondan özü üçün dua etməsini və Allahdan ona
sağlamlıq bəxş etməsini istədi. Peyğəmbər (s) cavabında buyurdu: «Sənin
sağalmağın üçün dua edərəm, amma səbr etsən daha yaxşı olar». Həmin kişi o
həzrətdən dua etməsini istədi.
Peyğəmbər
(s) ona buyurdu: Dəstəmaz al, dəstəmaz alarkən onun düzgün yerinə yetirilməsinə
diqqət yetir; sonra iki rəkət namaz qıl və namazdan sonra belə dua et:
«Pərvərdigara!
Mən Səndən istəyirəm və rəhmət elçisi olan Məhəmməd Peyğəmbərin vasitəsi ilə
Sənin dərgahına üz tuturam. Ey Məhəmməd, mən sənin vasitənlə Pərvərdigarıma üz
tutaraq hacətimə nail olmaq istəyirəm. Pərvərdigara, onun mənim barəmdə olan
şəfaətini qəbul et».
Ravi
sözünün davamında deyir: «Allaha and olsun, çox çəkmədi ki, bu kişi bizim
yanımıza gəldi, artıq onda korluqdan əsər-əlamət qalmamışdı».
Bu
hədis hacətlərin rəva olunması üçün Peyğəmbərə (s) təvəssül etməyin düzgün bir
iş olmasına dəlalət edir və sənəd baxımından da hədisşünasların əksəriyyəti
tərəfindən qəbul olunub.
O
cümlədən İbni Macə özünün «Sünən» kitabında(1-ci cild, 1385-ci hədis.) onu nəql etmiş və Əbu İshaqdan
onun düzgünlüyünə şahid gətirmişdir. Həmçinin Termezi «Əbvabul-əd’iyyə»
kitabında Əhməd ibni Hənbəldən,(«Müsnəd» kitabının 4-cü cildi.) Hakim «Müstədrək» kitabının 1-ci
cildində, Süyuti «Əl-camius-səğir» kitabında bunu rəvayət etmiş və hamısı
hədisin düzgün olduğunu təsdiq etmişlər.
2.
Səhabələrdən bə’ziləri, o cümlədən Cabir ibni Əbdüllah, İbni Abbas, Ənəs ibni
Malik rəvayət etmişlər ki, Fatimə binti Əsəd vəfat edərkən Peyğəmbər (s) onun
dəfn mərasimində hazır olub buyurdu: «Ey ana! Anamdan sonra Allah sənə rəhmət
etsin.» Sonra o Həzrət (s) Əbu Əyyubu, Üsaməni, Ömər ibni Xəttabı və bir qulamı
çağırdı ki, qəbri hazırlasınlar. Ləhədə çatanda Peyğəmbər (s) öz əlləri ilə onu
qazıb torpaqları çölə tökdü və qəbirdə bir az yatıb sonra buyurdu: «Allah O
kəsdir ki, dirildir, öldürür; O, diridir və heç vaxt ölməz. (Pərvərdigara)
peyğəmbərinin və məndən qabaq olan peyğəmbərlərin xatirinə, Anam Fatimə Əsəd
qızını bağışla, onun yerini genişləndir.»
Bu
rəvayəti Təbərani, Hakim, İbni Həyyan, İbni Əbi Şeybə və sairləri nəql edərək,
onun səhih olduğunu təsdiq etmişlər. Bu barədə başqa rəvayətlər də qeyd olunur.
Xülasə şəkildə demək olar ki, şəriət nöqteyi-nəzərindən Peyğəmbərə (s),
salehlərə və peyğəmbərlərə təvəssül etməyin caiz bir iş olmasında heç bir
şəkk-şübhə ola bilməz və mötəbər mənbələrdə bunu təsdiq etmək üçün kifayət qədər
dəlil və sübut vardır. Ona görə də bunu bid’ət hesab etmək olmaz.
İkinci
mehvər:
Vəhhabilər
peyğəmbərlərə, ilahi övliyalara təvəssül etməyi müşriklərin bə’zi şəxsləri,
yaxud bütləri Allaha pərəstiş etməkdə vasitə qərar vermələrinə oxşatmışlar. Bu
barədə keçən dərsdə qısa da olsa söhbət olundu. Bütpərəstlərin iradı bundadır
ki, onlar Allaha qovuşmaq üçün bütə pərəstiş edir, yaxud da Allahdan başqasını
çağırırlar. Halbuki, təvəssüldə vasitəyə pərəstiş olunmur, vasitənin müstəqil
təsir qüvvəsinə malik olması nəzərdə tutulmur. Sadəcə olaraq, burada Allah
yanında uca məqama malik olan müqəddəs bir şəxs vasitəçi rolunu oynayır.
Üçüncü
mehvər:
Peyğəmbərlərə
və ilahi övliyalara təvəssül etmək həqiqətdə onların yüksək məqamlı ruhlarına
təvəssül etməkdir, çünki, vəfat edib maddi dünyanı tərk etməklə ruh aradan
getmir. İslamın aşkar və danılmaz e’tiqadına əsasən, insan ölməklə ruhu ölmür,
həmişə diridir və buna görə də mələklər ona xitab edir, Nəkir və Münkərin
suallarına cavab verir. Bu barədə bir çox Qur’an ayələrini qeyd etmək olar. O
cümlədən «Qaf» 22, «İsra» 14, «Məryəm» 62, «İnfitar» 13, «İbrahim» 16 və 27,
«Ğafir» 46, «Ə’raf» 44, «Ənkəbut» 64, «Fəcr» 24, «Bəqərə» 155, «Ali-İmran»
170-171, «Fəcr» 27-30, «Mu’minun» 99, «Yasin» 26-27 və sair. Buna əsasən
övliyalara təvəssül etməkdə onların dünyəvi həyatları ilə ölümləri arasında heç
bir fərq yoxdur.
1.
Vəhhabilər «İsra» surəsinin 56-57-ci ayələrindən təvəssül etməyin caiz
olmadığını necə isbat edirlər?
2.
Vəhhabilərin dünyadan gedən peyğəmbər və ilahi övliyaların tə’sir mənşəyi
olmaması ilə əlaqədar dəlilləri nədir?
3.
Təvəssülün tə’rifini deyin.
4.
Qur’anda bu barədə ayələr vardırmı?
5.
Təvəssül barəsində gəlib çatan rəvayətlərin məcmusundan necə nəticə
alınır?
6.
Dünyadan köçən ilahi övliyalara təvəssül etmək mümkündürmü?
İYİRMİ
İKİNCİ DƏRS
1.
And içmək barəsində vəhhabilərin nəzəri nədir?
Vəhhabilərlə
sair firqələr arasındakı ixtilaflı məsələlərdən biri də budur ki, onlar yalnız
Allahın adına və sifətlərinə and içməyi caiz bilir, Allahdan başqa bir şeyə and
içməyi şirk və haram hesab edirlər. İbni Teymiyyə deyir: «Şirk iki cürdür: Böyük
şirk, məxluqdan şəfaət istəmək, onlara təvəssül və sair; kiçik şirk, riya,
süm’ə, Allahdan başqasına and içmək kimi.» Sən’ani deyir: Qəbri ziyarət edənlər
müşriklər kimidir. Onların əməl və rəftarları eynidir və onların adlarına and
içirlər. Hətta əgər bir vaxt Haqq sahibi Allahın adına and içsə ondan qəbul
etməzlər, amma öz böyüklərindən birinə və yaxud bir vəliyə and içilsə, qəbul
edərlər. Bütpərəstlər də belə idilər. Qur’anda belə buyurulur:(Zümər‒45.)
«Allah
təklikdə yad edilərkən axirətə imanları olmayanların qəlbləri ikrahlı olur. Əgər
Allahdan başqası yad edilsə, o zaman şad olub fərəhlənərlər».
Həmçinin
hədisdə qeyd olunur: «Hər kəs and içmək istəsə, Allahın adına and içməlidir, əks
halda sakit olmalıdır».
Rəsuli-Əkrəm
(s) bir kişinin Lata and içdiyini eşitdikdə ona göstəriş verdi ki, tövhid
kəlmələrini yenidən desin. Bu da göstərir ki, bütə and içmək küfrdür.»(Sən’ani «Təthirul-e’tiqad».)
Bu
nəzərin araşdırılmasını da üç istiqamətdə aparmaq lazımdır.
Birincisi:
Allahı başqalarının haqqına and verməyin caiz olub-olmaması;
İkincisi:
Allahdan başqasının adına and içmək;
Üçüncüsü:
Vəhhabilərin istifadə etdikləri hədislərin araşdırılması və
dəyərləndirilməsi.
Birinci
mehvər:
Vəhhabilər
Allahı başqalarının haqqına and verməyi caiz bilmir, onu haram və şirk kimi
qələmə verirlər. Onlar bu barədə iki dəlil gətirirlər: Birinci dəlil əvvəlki
dərsdə təvəssül bölməsində bəyan olundu. Peyğəmbərdən (s) bu barədə nəql olunan
hədislərdən məlum oldu ki, onu bid’ət və haram hesab etmək olmaz.
Vəhhabilər
bu işin caiz olmamasına dair gətirdikləri ikinci dəlildə deyirlər: «Allahın
məxluqlarından heç birinin üzərində haqqı yoxdur ki, Allahı onların haqqına and
verək». Amma ayə və rəvayətlərə müraciət etdikdə görürük ki, Allah-taala Öz
bəndələri ilə əlaqədar bə’zi haqları öhdəsinə almış və həm də peyğəmbərlər
bəndələrin Allah nəzərində olan hüquqlarını zikr etmişlər. Bu barədə bə’zi ayə
və rəvayətləri mülahizə edin:
«Mö’minlərə
kömək etmək Bizə olan bir haqqdır».(Rum‒47.)
«Allahın
haqq və’dəsidir ki, Tövrat və İncildə gəlmişdir».(Tövbə‒11.)
«Beləliklə,
mö’minlərin qurtuluşu onların Bizim üzərimizdə olan haqqıdır!»(Yunis‒103.)
«Həqiqətən
nadanlıq üzündən çirkin əməllər görən kəslərin tövbəsini qəbul etmək Allahın
öhdəsindədir».(Nisa‒17.)
Peyğəmbəri-Əkrəm
(s) buyurur:
«Öz
iffətini qorumaq və Allahın haram buyurduğu işlərə düşməmək üçün izdivac edən
şəxslərə kömək etmək Allahın öhdəsindədir».(Süyuti «Əl-camius-səğir», 2-ci cild.)
Həmçinin
buyurur:
«Üç
kəsə kömək etmək Allahın üzərindədir: Allah yolunda cəhad və çalışmaq, məkatib
(yə’ni, bir qul öz ağası ilə qərar bağlayır ki, müəyyən məbləğ pul vermək
müqabilində öz azadlığını əldə etsin) və öz iffətini qorumaq məqsədilə evlənən
şəxs».(«Sünəni ibni Macə», 2-ci cild.)
Buna
əsasən, Allah və Onun Peyğəmbəri (s) camaat qarşısında müəyyən hüquqları rəsmi
olaraq qəbul etmişsə, onda heç bir məxluqun Allah üzərində heç bir haqqı
olmadığını necə iddia etmək olar?! Aydındır ki, bu hüquqlar Allah-taala
tərəfindən bəndələr üçün lütf və mərhəmət olaraq və’də verilmişdir. Halbuki,
təkvini baxımdan heç kəs Allah yanında haqq sahibi deyildir.
İkinci
mehvər:
Vəhhabilər
Allahdan başqasına and içməyi haram və şirk hesab edirlər. Amma unutmaq olmaz
ki, həm Quranda, həm də Peyğəmbərin (s) sünnəsində Allahdan başqa şeylərə and
içməyin çoxlu nümunələri qeyd olunub. Allah-taalanın Özü Qur’anda sair
varlıqlara and içmişdir, o cümlədən: «vəl-əsri», «vəttin», «vəz-zəytuni»,
«vəturisininə vəhazəl bələdil əmin», «vəşşəmsi və zühaha...»
Burada
deyilə bilər ki, Allahın Özündən başqasına and içməsinin caiz olmasını
başqalarına aid etmək olmaz. Başqa sözlə desək, Allah-taala bütün varlıqların
Xaliqi olduğu üçün istədiyi şeyə and içməyə haqqı vardır, amma insanlara belə
bir icazə verilmir.
Cavabında
deməliyik ki, Allahdan bu fe’lin baş verməsi Onun çirkin və qəbahətli olmamasını
göstərir. Əgər biz bu işi şirk hesab etsək, onda necə mümkün ola bilər ki,
Allah-taala Özü Özünə şərik qoşsun?
Peyğəmbərdən
(s) nəql olunan rəvayətlərdə də Allahdan başqasına and içilməsi gözə çarpır.
Məsələn, «Vəbikə» (and olsun atanın canına), «Vələəmri» (öz canıma and olsun).
Bu kimi ifadələr o həzrətin sözlərində nəzərə çarpır.(Səhihi Müslüm, 4-cü cild, səh.224; «Əs-sünənil-kubra» 9-cu cild, səh.246; «Tarixi Bağdad», 12-ci cild, səh.377; «Məcməuz-zəvaid» 9-cu cild, səh-12; «Müsnədi Əhməd ibni Hənbəl», 5-ci cild, səh.225 və sair.) Belə
olan halda (nəuzibillah) demək olarmı ki, Rəsuli-Əkrəm (s) kiçik şirkə düçar
olub?
Bundan
əlavə, səhabələrin də kəlmələrində Allahdan başqa şeylərə and içməyin çoxlu
nümunələri müşahidə olunur. Məlum olduğu kimi, Peyğəmbəri-Əkrəm (s) onları bu
işdən çəkindirməmişdir.
Üçüncü
mehvər:
Vəhhabilər
öz nəzəriyyələrini əsaslandırmaq üçün Peyğəmbərdən (s) rəvayət olunan iki hədisə
istinad edirlər:
Birincisi:
Peyğəmbər (s) Ömərin atasının canına and içdiyini eşitdikdə buyurdu: «Allah sizi
öz atanıza and içməkdən çəkindirmişdir. Hər kəs and içmək istəsə, Allaha and
içsin, əks halda sakit olsun.»
İkincisi:
Bir kişi Ömərin oğlunun yanına gəlib dedi: «Kə’bəyə and içirəm!» Ömərin oğlu
dedi: «Yox, mən Kə’bənin Allahına and içirəm, çünki atam (Ömər) atasına and
içdikdə Rəsuli-Əkrəm (s) buyurdu: «Atana and içmə. Çünki, hər kəs Allahdan
başqasına and içsə, müşrikdir».
Birinci
rəvayətdə iki incə nöqtəyə işarə etməliyik. Birincisi: ataların canına and
içməkdən çəkindirilməyin səbəbi budur ki, İslamın əvvəllərindəki müsəlmanların
əksəriyyətinin ataları müşrik idilər. Buna görə də onların heç bir hörmət və
müqəddəsliyi yox idi ki, and içməyə layiq olsunlar. Halbuki, bir şeyə and içmək
onun əzəmət və hörmətini çatdırır.
Bu
müddəanın şahidi bu hədisdir: «Peyğəmbər (s) bütlərə and içməyin yanında
ata-analara and içməyi qadağan etmiş və buyurmuşdu: Ata-analarınıza və bütlərə
and içməyin».
Digər
məsələ bundan ibarətdir ki, ataya (yaxud Allahdan başqa hər bir şeyə) and
içməkdən çəkindirilməsi sadəcə olaraq mübahisəli məsələlərdə mühakimə yürüdüb
münaqişəni sona çatdırmaq məqsədi güdür. Çünki bütün İslam alimlərinin fikir
birliyinə əsasən, bu kimi hallarda andiçmə Allaha və Onun sifətlərindən başqa
bir şeylə gerçəkləşmir.
İkinci
rəvayətə də birinci rəvayətlə əlaqədar digər mühüm bir məsələni əlavə etmək
lazımdır: Ömərin oğlu öz ictihad və şəxsi nəzərinə əsasən, (Ömərin) atasına
xitabən buyurduğu kəlamı ümumi mənada götürərək, Kə’bə kimi müqəddəslərə and
içməyini də ona daxil etmişdir.
Buna
əsasən Peyğəmbərin (s) və bir çox səhabələrin Allahdan başqasına and içdiyini
göstərən rəvayətlər, həmçinin Allahın Özündən başqasına and içdiyini çatdıran
ayələri belə izah etmək olar ki, müşrikə, yaxud şirkin təzahürü olan şeyə,
(məsələn bütə) and içmək, ona e’tiqad bəsləmək və onu təsdiq etmək mə’nasına
olduğundan caiz deyildir. Amma Allaha mənsub edildiyinə görə müqəddəslik tapan
sair müqəddəslərə and içmək ümumi halda caizdir. Əlbəttə, münaqişəni həll etmək
məqamında Allahdan başqasına and içmək kifayət deyildir və bu işin şər’i və
hüquqi təsiri yoxdur.
1.
Vəhhabilər Allahdan başqasının adına and içməyi inkar edərkən hansı Qur’an
ayələrinə istinad edirlər?
2.
Nə üçün vəhhabilər Allahı başqalarının adına and verməyi caiz bilmirlər?
3.
Doğrudanmı mö’minlərin Allah yanında heç bir haqqı yoxdur?
4.
Allahdan başqasının adına and içməyin caiz olmasını necə isbat etmək olar?
5.
Ömərin oğlundan nəql olunan hədis necə izah olunur? |